Il pli impurtant en furma concisa:

Medias èn indispensablas per nossa democrazia directa. Ellas rapportan en moda fundada e critica ed infurmeschan davart posiziuns e fatgs relevants e mintgatant er malcumadaivels. Uschia furman ellas il fundament da process democratics da la furmaziun da l’opiniun. Cun lur reportaschas da e per las regiuns pussibiliteschan ellas debattas e contribueschan a la solidaritad en noss pajais federalistic.

La funcziun relevanta che las medias han per la democrazia è periclitada acutamain: entradas da la reclama sbassantas mettan enormamain a la prova la branscha da medias svizra. Dentant mo medias ch’èn rentablas economicamain pon er rapportar en moda independenta. Per garantir il provediment da basa medial ha il parlament deliberà in pachet da mesiras en favur da las medias il zercladur 2021. Quel prevesa d’augmentar ils daners da promoziun, avant maun dapi decennis, per 123 milliuns francs per onn.

Cun las trais pitgas promoziun da meds stampads, promoziun da meds digitals e mesiras per l’entir sistem da medias generalas è avant maun in pachet da mesiras effectivas per l’entir sistem da medias svizzer. Quai vegn sustegnì:

  • var 170 gasettas e revistas en tut las parts da la Svizra, da gasettas emnilas localas a gasettas quotidianas regiunalas fin a titels naziunals.
  • var 1000 publicaziuns d’uniuns d’utilitad publica, da fundaziuns e da partidas da mintga colur politica.
  • in grond dumber da plattafurmas da novitads online.
  • 21 radios locals e 13 televisiuns regiunalas en tut las regiuns linguisticas da la Svizra.
  • ulteriuras organisaziuns impurtantas per la branscha da medias sco agenturas da novitads, instituziuns per la scolaziun da schurnalistas e schurnalists, organisaziuns da la branscha sco p.ex. il Cussegl svizzer da la pressa e soluziuns d’infrastructura per l’entira branscha.

Il pachet en favur da las medias è concepì per 7 onns en il senn d’ina soluziun transitorica. Il project da votaziun vegn sustegnì d’in spectrum politic vast ed approvà dal Parlament federal e dal Cussegl federal.

Il pachet en favur da las medias promova la diversitad da las medias, rinforza l’independenza redacziunala e garantescha il provediment multifar da basa schurnalistic da la populaziun en tut las regiuns linguisticas da la Svizra.

Ils elements dal pachet en favur da las medias en detagl

La gronda part – var dus terzs – dals daners da promoziun vegn pajada a la Posta svizra ed ad autras interpresas da furniziun che sbassan las tariffas per consegnar durant il di e da nov er la damaun marvegl las gasettas e las revistas abunadas. Quai vegn la finala dabun a las lecturas ed als lecturs. Anc adina consumesch'ins en Svizra pli savens medias stampadas che medias online.

 

Var 170 gasettas e revistas vegnan sustegnidas en tut las parts da la Svizra. La reducziun per publicaziuns cun ediziuns pli pitschnas è pli auta.

 

Ultra da las gasettas quotidianas ed emnilas vegnan sustegnidas cun la promoziun indirecta da la pressa er las revistas per las commembras ed ils commembers da fundaziuns d'utilitad publica, d'uniuns e da partidas. Quai èn var 1000 publicaziuns d'in vast spectrum social e politic.

Da nov vegnan er medias online sustegnidas cun il pachet en favur da las medias cun annualmain 30 milliun francs. La basa da calculaziun per reparter ils daners da promoziun è la svieuta che vegn generada cun ils cuntegns online en furma d'abunaments, da pass dal di u da consultaziuns singulas sco er cun contribuziuns voluntaras da las lecturas e dals lecturs. Qua vala: pli pitschna ch'è la svieuta e pli aut ch'è il sustegn procentual. Cun la promoziun da start-up prevesida na vegnan plinavant betg mo resguardadas purschidas online existentas, mabain spezialmain er novas purschidras e novs purschiders.

 

Il sustegn n'è betg lià ad in mandat da prestaziun tematic. Cun quai è garantida la separaziun dal stadi e da las medias. Las redacziuns restan libras, independentas e criticas.

Var 28 milliuns francs vegnan investids mintg'onn per projects che cumpiglian pliras branschas che stattan a disposiziun a l'entir sectur da medias.

 

Concretamain sustegnidas vegnan purschidas da scolaziun e da perfecziunament per schurnalistas e schurnalists, per agenturas da novitads e per ulteriuras organisaziuns da la branscha sco p.ex. il Cussegl svizzer da la pressa u projects d'infrastructura dad IT. Questas instituziuns èn da gronda impurtanza per il sistem da medias.

 

Da las mesiras profiteschan independentamain dal model da fatschenta tut las medias online, pia er purschidas gratuitas. La finanziaziun cumprovada da las staziuns da radio e da televisiun regiunalas vegn rinforzada supplementarmain cun il pachet en favur da las medias. La contribuziun da promoziun vegn augmentada per maximalmain 28 milliuns francs per onn.

 

Questas mesiras vegnan finanziadas cun la taxa da radio e televisiun gia existenta.

Ussa s'annunziar
per la
newsletter!

Cun nossa newsletter essas Vus adina al current! Nus As infurmain davart tut nossas activitads e davart il stadi actual en connex cun il pachet en favur da las medias.