Cinq buns motivs
per dir GEA al pachet
en favur da las medias.

L'independenza da las medias e la concurrenza d'opiniuns èn indispensablas per nossa democrazia directa. Per la furmaziun da l'opiniun libra en debattas politicas e socialas dovri infurmaziuns uschè diversas, crediblas e fundadas sco pussaivel e mintgatant er malcumadaivlas. Mo uschia èsi pussaivel da surpigliar responsabladad democratica. Nossa Svizra federalistica dovra dapli che mintga auter pajais medias fermas ed independentas. Quellas garanteschan numnadamain la concurrenza d'opiniuns ed han la rolla da la quarta pussanza critica. Las medias svizras èn la plazza dal vitg da la democrazia directa.

 

Il pachet en favur da las medias rinforza l'independenza da las medias svizras. Il stadi e las medias restan cleramain separads, i na dat naginas obligaziuns ed incaricas da prestaziun per las chasas edituras. Gasettas e revistas cun in'orientaziun progressiva vegnan sustegnidas gist tuttina sco titels conservativs. Il medem vala per magazins da commembras e commembers u gasettas da partida da «sanestra» fin «dretga». La promoziun da la pressa è sa cumprovada dapi decennis sco instrument ed è tradiziun svizra dapi l'onn 1848.

 

Tgi che vul in schurnalissem independent di GEA al pachet en favur da las medias.

Il federalissem e la democrazia directa èn inimaginabels senza ina cuntrada mediala d'auta qualitad e multifara, spezialmain en las differentas regiuns linguisticas. La Svizra viva da la diversitad da differentas culturas e regiuns linguisticas. Las medias regiunalas dattan ina plattafurma ed ina vusch al mastergn, a la vita da las uniuns, a las interpresas localas pitschnas e mesaunas, al sport regiunal ed a la politica locala. Damai che nus votain en Svizra er sin plaun chantunal e communal, dovri questa diversitad. Senza medias localas e regiunalas fermas vegn quella flaivlentada considerablamain, e quai periclitescha ils process democratics en las vischnancas ed en ils chantuns.

 

Las medias regiunalas èn sut in squitsch massiv pervia dal svilup regressiv dal martgà da reclama. E cun digitala transfurmaziun digitala na pon ins oz anc betg gudagnar daners en las vischnancas ed en las regiuns. Per quai dovri novs models da fatschenta e novas investiziuns che las interpresas pon dentant strusch realisar or d'atgna forza. Qua gida il pachet en favur da las medias: l'agid è survesaivel vegn prestà per in temp limità e porta avantatgs proporziunalmain bler pli gronds per las interpresas da medias pitschnas regiunalas e localas. Il pachet gida da garantir la purschida schurnalistica en las regiuns.

 

Tgi che vul rinforzar la diversitad regiunala di GEA al pachet en favur da las medias.

Anc adina è la gasetta il medium che vegn duvrà il pli savens en Svizra – anc avant la televisiun, il radio e las medias online. La distribuziun en mintga chantunada da la Svizra è finanzialmain ordvart pretensiusa. Ils custs da la posta per spedir gasettas e revistas èn creschids en il passà e vegnan vinavant a crescher. Il pachet en favur da las medias sbassa ils custs da spediziun e garantescha uschia la distribuziun quotidiana, matutina e da dumengia da gasettas e da revistas en tut las chaschas da brevs da la Svizra. Blers umans èn dependents da questas infurmaziuns da las medias stampadas.

 

Il pachet en favur da las medias promova er programs da radio e da televisiun privats e sustegna la reportascha schurnalistica impurtanta dals radios locals e da las televisiuns regiunalas. Quels infurmeschan lur public en moda cumplessiva e da tuttas uras cun novitads e cun contexts davart ils eveniments ils pli impurtants en lur intschess d'emissiun. Uschia prestan ils radios locals privats e las televisiuns regiunalas en lur regiuns respectivas in service public indispensabel.

 

Cun il pachet en favur da las medias vegn rinforzà il provediment cun infurmaziuns en las regiuns cun gasettas, cun medias online, cun radio e cun televisiun. Uschia vegn garantì che tut las parts da la populaziun han vinavant access a schurnalissem da gronda qualitad.

 

Tgi che vul novitads da sia regiun di GEA al pachet en favur da las medias.

La transfurmaziun digitala ha mess sutsura il model da fatschenta da las medias svizras. Il martgà da medias e l'utilisaziun da las medias sa midan da preschent radicalmain. Oz van dus terzs damain da las entradas da la reclama che anc avant diesch onns als meds stampads. La consequenza: i stattan a disposiziun damain daners per il schurnalissem, en spezial en las regiuns.

 

Il medem mument che las entradas sa sminueschan spetgan investiziuns impurtantas per la creaziun da models da fatschenta digitals. Er sch'ils meds stampads vegnan duvrads oz anc adina pli frequentamain che las medias online, va il trend cleramain en direcziun da purschidas digitalas. Las interpresas da medias offran gia oz ina purschida schurnalistica online cumplessiva. Ma cun cuntegns schurnalistics èsi difficil d'etablir en la rait models da fatschenta persistents – gist en il martgà local e regiunal.

 

La funcziun relevanta da las medias per la democrazia è periclitada acutamain. Qua èn necessaris ulteriurs sforzs ils proxims onns per garantir il provediment da basa medial. Il pachet en favur da las medias pussibilitescha investiziuns ed è ina finanziaziun d'interpresa transitorica per ils proxims 7 onns, in model ch'ins enconuscha er da la promoziun d'exports u da start-ups.

 

Tgi che vul investir en il futur da las medias di GEA al pachet en favur da las medias.

Medias independentas èn la spina dorsala da nossa democrazia directa. Senza ina rapportaziun differenziada e critica na datti nagina furmaziun da l'opiniun libra. En Svizra procuran passà 11'000 schurnalistas e schurnalists da las medias privatas che la populaziun vegnia provedida di per di cun infurmaziuns: localas, regiunalas e naziunalas. Las medias tractan temas impurtants, pussibiliteschan debattas e promovan uschia l'identitad e la coesiun en noss pajais federalistic.

 

Questa diversitad da las medias è periclitada acutamain: dapi onns sa sbassan ils gudogns da las entradas da la reclama irresistiblamain. La pandemia dal coronavirus ha accelerà il trend negativ. L'onn 2020 muntavan ils retgavs da reclama dals meds stampads svizzers a 720 milliuns francs, pia var dus terzs pli bass che anc avant 10 onns. Il futur da bleras gasettas pitschnas è en privel e cun quai er lur rolla sco portavuschs criticas per la democrazia.

 

Percunter s'avanzan massivamain ils gigants d'internet sco Facebook, Google u TikTok. Els genereschan mintg'onn var 2 milliardas francs cun reclama. Cun quai priveschan quests concerns il schurnalissem d'infurmaziuns da ses fundament finanzial. Ma gist en temps da fake news e dischinfurmaziun èn in schurnalissem da qualitad ed ina diversitad da las medias pli impurtants che mai. Ma las medias pon mo rapportar en moda independenta, sch'ellas n'èn betg periclitadas economicamain. Il pachet en favur da las medias sustegna l'independenza da las medias svizras privatas e cun quai la democrazia directa sco er il federalissem en noss pajais. Pertge tuttas duas chaussas èn impussiblas senza ina cuntrada mediala multifara, spezialmain en las differentas regiuns linguisticas.

 

Tgi che vul fatgs empè da fake news di GEA al pachet en favur da las medias.

Ussa s'annunziar
per la
newsletter!

Cun nossa newsletter essas Vus adina al current! Nus As infurmain davart tut nossas activitads e davart il stadi actual en connex cun il pachet en favur da las medias.